Sâkiyâ fasl-ı bahâr oldı getür câm-ı şarâb
Mutribâ sâza el ur sen de kanı çeng ü rebâb
Yine nergis gibi gülşende gözüñ fikri-y-ile
İçelüm bâde-i gül-reng olalum mest ü harâb
Bezm-i ğamda sanemâ câm-ı lebüñ hasretine
Cigerüm âteş-i hecrânuñ ile oldı kebâb
Görüben yüzüñi ussum da gédüben düşdük [de]
Acıyup merdüm-i çeşmüm saçar üstüme gül-âb
Haste-dil derdine em sordı lebinden néce kim
Ol tabîb-i dil ü cân vérmedi bir kerre cevâb
Ger gör e lü’lü’-i lâlâ sanemâ dişlerüñi
Hacletinden sadef içinde eriyüp ola âb
Âferîn tab‘-ı güher-bâruña ÂHÎ ki senüñ
Silk-i nazm içre dizer söz yérine dürr-i hôş-âb
