Ne nakş éder bizüm ile nigârı gördüñ mi
Ne fitneler koparur rûzgârı gördüñ mi
Bu kanlu kanlu yaşumdan revân olup göz göz
Bu çeşme çeşme akan cûybârı gördüñ mi
Direk direk dikilürken kapuñda dûd-ı dilüm
‘Alem ‘alem göge ağan şerârı gördüñ mi
Kaçup kaçup da ırakdan dönüp dönüp yüzüme
Kıya kıya bakan ol ğamzekârı gördüñ mi
Bu pâre pâre ciger kanı ile sînemde
Bölük bölük açılan lâlezârı gördüñ mi
Kabâ-yı al geyüp gül gibi çemenlerde
Güzel güzel salınan kadd-i yârı gördüñ mi
Sorar érişdügine ÂHÎ göz yaşını döküp
Kabâ-yı surh ile ol gül-‘izârı gördüñ mi
