Hâ çeker yaşum beni durmaz bu deryâdan yaña
Seyre çıkmışdur meger dil-ber Kalata’dan yaña
Kandasın éy serv kim bâğuñ gül ü nergisleri
Göz kulağ olmış durur sen serv-i bâlâdan yaña
Her harâmî-ğamze âhû-çeşm olan dil-berlere
Yüz çevirmek mi gerekdür böyle sahrâdan yaña
Ka‘be hakkı ol Firenk oğlanı kıblem olmasa
Kâfirem ger bir kadem bassam kilîsâdan yaña
Gözlerüm yaşı deñizler gibi oldı kandadur
Ol sanem seyr étmege gelmez mi deryâdan yaña
Érmedin şâm-ı ecel ÂHÎ nasîbüñ var iken
Vaktidür şimden gérü ‘azm eyle Me’vâ’dan yaña
