Ğamzeñ okına nişân olmağa cân ü ten baña
Halka halka dâğlar geydürdi bir cevşen baña
Lâle gibi çünki ben sahrâ-nişînler şâhıyam
Kırmızı eyvân yéter bu kanlu pîrâhen baña
Gözlerüm berg-i semen gibi ağardı kandasın
Pîrlik vaktinde gel éy serv-i sîmîn-ten baña
Hasteyüm ma‘zûr tut bi ’llâh eglendümse gel
Éy ecel kûy-ı ‘ademde bir nefes eglen baña
Hançerinden çekdüğüm şerh olmaz ÂHÎ ol şehüñ
Diller olsa haşra dek kabrümde her sûsen baña
