Âşık oldum bir cemâl-i cân-fezâya görmedin
‘Işk ile îmân getürdüm Mustafâ’ya görmedin
Göklere ağar duhânum âteş-i âhum gibi
Yanaram yérden göge bir meh-likâya görmedin
Cân deger dédüm hatâ étdüm ırakdan la‘lüñe
Müşkil olur cevheri dutmak bahâya görmedin
Göklere uçurdılar dün bir humâ-yı tal‘atı
Uçdı göñlüm şâhbâzı bir humâyı görmedin
Âşinâlık étmedin bî-gânelik eyler bize
Gör ne lutf eyler ırakdan âşinâya görmedin
Her ne cevr étse yéridür ÂHÎ ol dil-ber saña
Böyle dil vérmek neden bir bî-vefâya görmedin
