‘Âleme Neşr-i Füyûzât Eyleyüp Rabb-i Mecîd

Arpaeminizade Sami

? - 1733
  • 509 okuma
  • 5 sene önce
  • Yorum Yok
0 ● 5 0 Oy

‘Âleme neşr-i füyûzât eyleyüp Rabb-i mecîd
Haclegâh-i gaybdan oldı ruh-i şâdî bedîd

Mevc mevc olup bihâr-i bî-kerân-i inbisât
İtdi pür-dür sâhil-i tab’ı kef-i şevk-i cedîd

Nev-’arûs-i bâhter olup tutuk-bend-i neşât
Farkına behcetle saçdı ahterân dürr-i nazîd

Zühre der-dest eyledi câm-i hilâli şevk ile
Çâr-tâk-i âsmânda itmege ‘ayş-i ragîd

Atılan sanma şihâb itdi felek tertîb-i sûr
‘Arsagâh-i şâmda hayl-i nücûm oynar cirîd

Hâne-i dil şevk ile toldı der-i hamyâzeden
Gayrı dest-i redd olur şahs-i gama sedd-i sedîd

Tengnâ-yi dehrde kesb eyleyüp halk inşirâh
Refte refte başladı hall olmaga ‘akd-i ümîd

Bâreka’llâh bu ne hengâm-i meserret-bahşdur
K’olmada her sâ’ati reşk-âver-i eyyâm-i ‘îd

Oldı engüşt-i kalem-ber-fem ta’accüble devât
Muhbir-i ilhâm-i Bârîden taleb-kâr-i nüvîd

Didi istikşâf idüp gûyâ lisân-i hâl ile
Bâ’is-i şâdî nedür ey mû-şikâf ‘akl-i vedîd

Bu haber ilhâm-i Rabbânîden oldı âşkâr
Hâme-i çâbük-revi irsâl idüp hem-çün berîd

Didi büşrîlik cenâb-i şâh-i ‘âlem eyledi
Bende-i hâsın harîm-i ‘ismete sıhr-i cedîd

Nice şeh sultân-i heft-iklîm-i İskender-gulâm
Kim derinde pâdşâhân-i cihân ‘abd-i ‘abîd

Levh-i gerdûna bu vech üzre sezâ sebt eyleyüp
Vasf-i ‘âlîsin ‘utârid eyleye beytü’l-kasîd

‘Akl-i kül-tab’ ü Felâtûn-re’y ü Efrîdûn-haşem
Feylesûf-i hikmet-ârâ vü hıredmend-i reşîd

Bahr-i nesl-i âl-i ‘Osmânîde zâhir olmadı
Halk olaldan nüh sadef zâtı gibi dürr-i ferîd

Dâver-i ‘âdil şeh-i kâmil hıdîv-i sâf-dil
‘Âkil-i hallâl-i her müşkil şehenşâh-i vahîd

Bû Bekir-sıdk ü ‘Ömer-insâf ü zü’n-nûreyn-hilm
Murtazâ-savlet veliyy-i kâmil-i ‘âlem-mürîd

Zıll-i Hak sultân Ahmed hân-i gâzî kim anun
Mihr-i ikbâl âstânından olur dâ’im bedîd

Her kesün mikdâr-i isti’dâd-i zâtîsin bilür
Fehm idince rütbe-i ‘aklın ider kadrin mezîd

Bu yeter şâhid kemâl-i dikkat-i idrâkine
Eyledi bir ‘âkil ü dânâyı dâmâd-i sa’îd

Lâyık-i sıhriyyet-i ‘ismet-serây-i saltanat
Mahrem-i hâs olmaga şâyeste bir merd-i reşîd

Ahsenü’l-hulk-âsaf-i hâtır-nevâz-i nîk-hû
Müttakî sâhib-kerem perhîz-kâr ü rû-sefîd

Hayr-hâh-i saltanat paşa-yi ‘âlî-menkabet
Ehl-i cûd ü ehl-i himmet sâhib-i hulk-i hamîd

Neş’e-i re’yün göreydi mest olurdı Bû ‘Alî
Şâd olur geldükçe nutka rûh-i Hassân-i Velîd

Pâdşâh-i dehre dâmâd ü musâhib olmaga
Hâsılı her vech ile ahrâ o düstûr-i vahîd

Eyleye dâmâdını sultân-i ‘ismet-şânını
Şâh-i ‘asr ile mu’ammer hazret-i Rabb-i mecîd

Düşmen-i bed-hâhını mahzûl idüp şâhenşehün
Devlet ü ikbâl ile ‘ömrin ide Hak ber-mezîd

Dâver-i dîni zafer-yâb eyleye Bârî-Hudâ
Ola makhûr ü müdemmer cümle küffâr-i ‘anîd

Leyle-i kadr-i zifâf oldukda târîhi içün
Fikr-i tab’umla iderken Sâmiyâ güft ü şinîd

Nâ-gehân mecmû’a-i gaybiyye-i ilhâmdan
Cân meşâmına dü mısra’ virdi bû çün müşk-bîd

Sûret-i evc-i ‘ulâyı mısra’-i evvel geçüp
Çün meh-i tâm oldı dilde mısra’-i sânî bedîd

Oldı İbrâhîm paşa sıhr-i sultân-i celîl
Şâha dâmâd oldı İbrâhîm paşa-yi sa’îd

Sene 1129

Arpaeminizade Sami

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir