Beyâz-i dîde-i Yûsuf gibi o ten nâzük
Harîr-i nûr-i nigehden de pîrehen nâzük
Nigâh-i sâde yeter hayf ider öpen bedenin
Ki yek nefesle olur süst o penbeden nâzük
Tamâm lerziş ü ser-tâ-kadem temevvüc-i nâz
Hırâm nâzük ü pâ nâzük ü beden nâzük
Dehânı gevher-i nâ-süfte-i hacâlet iken
Ne nâzükâne geçer rişte-i suhan nâzük
Solar bu mess-i nazardan o fart-i şâmmeden
Neden olur çü ruh-i yâr gül neden nâzük
Belürdi hatt-i siyeh rûy-i hâldârında
Benefşe nâzük ü gül nâzük ü çemen nâzük
Tahayyülümde olur ol perînün ey Sâmî
Miyânı çün müje-i âhû-yi Hoten nâzük
