Cûd ü himmet ana dirler ki be-cây-i ta’zîr
‘Afv ile bende-i güstâha ide lutf-i kesîr
Sâfdur tab’-i kerem âyîneden kim olmaz
‘Aks-i rûy-i siyeh-i mücrim ile jeng-pezîr
Ehl-i rif’atdür iden cezb-i kulûb-i zu’afâ
Zerre-perverlik olur kâ’ide-i mihr-i münîr
Bir vücûdun ki siriştinde ola nûr-i hilm
Zulmet-i gayz ü gazab itmez anı tîre-zamîr
İder a’zâr-i güneh-kârı kabûl ehl-i kerem
Cûş-i âmîziş-i enhârı yem itmez tenfîr
Meşreb-i pâk-i hatâ-pûşa tagayyür gelmez
Hâr ü has bahr-i derûn-sâfı ider mi tekdîr
Maslahat-bîn-i niyâz-âver olan zâtun ider
Kâr-i düşvârını Allâhu te’âlâ teysîr
‘Ukde-i hâtıra-i bî-kesi hall eyleyene
Hod-be-hod münhal olur her girih-i emr-i ‘asîr
Kezm-i gayz eyleyenün vasf-i pesendîdesini
İtdi furkân-i kerîminde beyân Rabb-i kadîr
‘Afvdur şîme-i müstahsene-i ehlu’llâh
‘Afvdur sünnet-i peygam-ber-i mi’râc-serîr
Hüsn-i hulk âdeme ser-mâye-i âsâyiş olur
Dâ’imâ mîh-i benânında döner çerh-i esîr
Dest-i ikbâli olur mâye-i gencîne-i kâm
Bir yıkılmış dili her kim ki iderse ta’mîr
İttisâf eylese ahlâk-i hamîdeyle kişi
İder ef’âline bî-şübhe tevâfuk takdîr
Seng galtîde olur âb-i mülâyimle k’ider
Kâr-i sahta galebe nermî-i rûy-i tedbîr
İki ‘âlemde gül-i devleti yek-reng olur
Halkı kim itmez ise hâr-i sitemle dil-gîr
Bed-nihâd itse de sad sâle ‘ibâdet olamaz
Bir nefes vaz’-i hulûsâne-i hoş-hûya nazîr
Eyleyen hâk-nişînâna tevâzu’la nigâh
Mihrveş mesned-i vâlâsı olur evc-i münîr
Her sebük-magz idemez zâ’ika-i taklîdin
Lezzet-i fıtrat-i marziyye ile vâye-pezîr
Dâd-i Hakdur hele şîrînî-i hüsn-i ahlâk
Leb-i ihlâs ulü’l-elbâba olur şekker ü şîr
Şimdi bu vaz’ ile ber-tıbk-i beyân-i pîşîn
Muttasıf tab’-i silâhdâr-i şeh-i ‘âlem-gîr
Nice şeh mazhar-i ilhâm-i hudâvend-i ezel
Nice şeh ‘âkil ü dâd-âver ü Dârâ-tedbîr
Bâreka’llâh zihî pâdşeh-i heft iklîm
Ki sezâ dergehine heft kıral olsa esîr
Bihterîn-gevher-i silk-i neseb-i ‘Osmânî
Mâlik-i mülk-i cihân sâhib-i dîhîm ü serîr
Vera’ ü zühd ile evreng-i hilâfetde ‘alem
Fıtnat ü ‘adl ü kiyâset ile ‘âlemde şehîr
Nüh felek kulzüm-i cûdında habâb-i kemter
Ki o şâhenşeh-i ‘adl-âver-i bî-misl ü nazîr
Hâne-i hâssadan fehm idüp isti’dâdın
İtdi bir Edhem-i dânâyı silahdâr ü müşîr
Eyledi tîg-i mülûkâne-i cevherdârı
Dûş-i ikbâline âvîhte sultân-i dilîr
Ten-i iclâline her vech ile çespânterdür
Zînet-i hil’at-i zer-beft ü murassa’-şemşîr
Meclis-i ‘âliye-i saltanata mahrem-i hâs
Gûşdâr-i kelimât-i şeh-i şîrîn-takrîr
Farkına üsküf-i zer-kâr-i sa’âdet lâyık
Kâmet-i câhına şâyeste libâs-i takdîr
Hidmet-i hırka-i mahbûb-i Hudâda nice dem
İtdi bâzû-yi ‘ubûdiyyeti çünkim teşmîr
Ya’lema’llâhu te’âlâ iderüm bî-şübhe
Hil’at-i devlet-i dâreyn ile anı tebşîr
Pertev-i rüşd ü sedâd âyîne-i tab’ından
İtmede rûşenî-i cevher-i ‘aklın tenvîr
‘Unsur-i pâki füyûzât-i kemâlât ile pür
Tıyneti mâye-i envâ’-i sadâkatle fatîr
Dil-nevâz ü şefakat-senc-i kerîm oldugına
Şâhid-i ‘adl yeter tecribe-i ‘abd-i fakîr
Yalunuz bahşiş-i nakdîne degüldür ihsân
Lutfdan ‘add olunur ‘afv ile hüsn-i ta’bîr
