Dile kavâfil-i ‘aşk-i Hudâ gelür görinür
Gubâr-i sürme-i savt ü sadâ gelür görinür
‘İzâr-i yâre hat-i müşksâ gelür görinür
Kenâra mevce-i ‘anber-nümâ gelür görinür
‘Arak-feşân leb-i dildârdan sıkıldukça
Mey-i sefîdde reng-i hayâ gelür görinür
Kirişme-der-bagal-i şerm iken o gamze-i şûh
Neşât-i bâde-i hâtır-güşâ gelür görinür
Olursa elde eger dûr-bîn-i şîşe-i mey
Ne denlü dûr ise dilden safâ gelür görinür
Surâdıkât-i ‘ademden misâl-i zıll-i hayâl
Hezâr sûret-i hestî-nümâ gelür görinür
Derûn-i mahzen-i târîk-i dilde gevher-i dâg
Şikâf-i zahm-i tenümden ziyâ gelür görinür
Nühüfte eyleme hüsnün nikâb-i nahvetden
Sakın sakın hatun ey bî-vefâ gelür görinür
Yüki cevâhir-i mazmûn yem-i ma’ânîden
Sefîne-i gazelüm Sâmiyâ gelür görinür
