Düşdük reh-i mahabbete kalb-i rakîk ile
Seyl-âb-i eşk ü zemzeme-i yâ refîk ile
Mânend-i hayme ey ‘alem-efrâz-i deşt-i nâz
Âgûşa çeksem âh seni bir tarîk ile
Pîr-i mey ile aramuza söz karışduran
Halt eyler eskiyüz o baba-yi ‘atîk ile
Zâhid nice sebûyı bilâ-cür’a çekmece
Gör imtizâc-i bâde-keşânı rahîk ile
Sıg gitme zâhid ehl-i dile i’tirâzda
Râz-âşinâ degülsin o bahr-i ‘amîk ile
Dilden göçerdi kâfile-i fikret-i vatan
Terk-i diyâr ideydüm o yâr-i sadîk ile
Sâmî sezâdur olsa nüvişte bu nazm-i pâk
Levh-i beyâna sûde-i müşk-i fatîk ile
