Hat gelse lebüm em dir idün şimdi ne dirsün
Bu va’di mukaddem dir idün şimdi ne dirsün
Ey şûh-i hat-âver bakalum var mı safâsı
Âyîne-i ‘âlem dir idün şimdi ne dirsün
Gel söyleşelüm cümle geçen demleri cânâ
Hayrânuna ebkem dir idün şimdi ne dirsün
Keyf-i mey-i ‘aşk almış işitdüm seni kâfir
Mestânene hep kem dir idün şimdi ne dirsün
Mahmûr olup ey mest-i mey-i nahvet-i devlet
Çekmem kadeh-i gam dir idün şimdi ne dirsün
Gördün mi nedür ‘âkıbet-i cennet-i ikbâl
Evvel kime âdem dir idün şimdi ne dirsün
Ey hâce tutıldı nefesün kabre de girdün
Bu ‘âleme sıgmam dir idün şimdi ne dirsün
