Hatt-i lebün ki mısra’-i zîb-i me’âldür
Îhâm-i bûse anda ne rengîn hayâldür
Dil kavs-i ebruvânı elinden neler çeker
Seyr eyle kadd-i ham-şudemi ana dâldür
Eyler şikeste murg-i dilün perr ü bâlini
Ol tıfl-i nev-resîde dimez kim vebâldür
Ol nahl-i ‘işve her ne kadar ser-keş olsa da
Bâr-i niyâz ile egilür ihtimâldür
Zann itme jâledür görinen rûy-i yârde
Güller çemende gark-i hoy-i infi’âldür
Nezzâre dûr-bîn-i bilûrîn olursa da
Görmek ten-i nizârumı emr-i muhâldür
Sâmî ümîd-i câm-i Cem itmez gedâ-yi ‘aşk
Memnûn-i bâde-hârî-i köhne-sifâldür
