Kişver-i ‘aşkun şeh-i sâhib-kırânıdur gönül
Ceyş-i endûhun re’îs-i kârvânıdur gönül
Katresinde nice deryâlar nihân-ender-nihân
Evvelîn-mevc-i muhît-i bî-nişânîdür gönül
Bâ’-i bismi’llâh bed’-i kâf ü nûna noktadur
Merkez-i pergâr-i sırr-i kün fe-kânîdür gönül
Noktasında ma’nî-i seb’a’l-mesânî muhtefî
Şerh-i metn-i heft-cild-i âsmânîdür gönül
Mahrem-i halvet-serây-i perde-i ilhâmdur
Şâhid-i gaybun Nedîm-i nükte-dânıdur gönül
Cür’ası hâk ü habâbı nüh-kıbâb-i çâr-tâk
Sâgar-i ser-şâr-i bezm-i lâ-mekânîdür gönül
Devr-i eflâke nuhustîn-nokta-i pergârdur
Hâme-i sun’un süveydâ-yi lisânıdur gönül
Perveriş-yâb-i fürûg-i âftâb-i ‘aşk olur
Gevher-i hûnîn-i dâg var ise kânıdur gönül
Nahl-i âh-i âteşîn-bâr-i zemîn-i sîneye
Tohm-i pür-neşv ü nemâ-yi câvidânîdür gönül
Kâf-i istignâ-yi ‘aşk ü evcgâh-i himmetün
Sâmiyâ ‘ankâ-yi vâlâ-âşyânıdur gönül
