Bir gül-i tersin seni Hak yad elinden saklasun
Ğonca-i nevrestesin horyad elinden saklasun
Göñlümüñ ma‘mûresin zulm ile vîrân eyledüñ
Hak senüñ seng-i dilüñ Ferhâd elinden saklasun
Dâma salduñ bakmaduñ dil murğınuñ feryâdına
Saydına rahm eylemez sayyâd elinden saklasun
İtlerüñle hemdem olsam mâni‘ olma ki rakîb
Âşinâ çıkmayayın Hak yad elinden saklasun
ÂHÎ’nüñ kılmaz mısın âh âteşinden sen hazer
Hak seni bu nâle vü feryâd elinden saklasun