Mülûkün nâmdârı ‘âlemün şâh-i zafer-kârı
Ki zâtın eylemiş Bârî güzîn-i devlet-i ecdâd
Cihân mülkine vâris hazret-i hân Ahmed-i sâlis
Nizâm-i kevne bâ’is dâver-i Cem-câh-i Kisrâ-dâd
O şâhenşâh-i ‘adl-âyîn-i evreng-i sa’âdet kim
‘Adâlet-pîşedür ‘ahdinde gerdûn-i sitem-mu’tâd
Hudâvend-i Sikender-çâker ü Dârâ-celâdet kim
Tenezzül eylemez itmeklige Dârâyı isti’bâd
Ne gûne kâbiliyyet varsa hep zâtında peydâdur
Vücûdın eylemiş Hak nüsha-i kübrâ-yi isti’dâd
O sultân-i cihân kim bendegân-i âstânında[n]
Kimin vâlî-i Mısr eyler kimini hâkim-i Bagdâd
Eyâletler ki hâlâ kulların ta’yîn idüp zabta
Selefde oldı cây-i saltanat ber-vech-i istîdâd
Hemedân Gence Tiflîs ü Revân Şirvân ü Tebrîzün
Ehâlîsiyle Îrân mülki yek-ser emrine münkâd
Husûsâ Yesrib ü Bathâda hükmin eyleyüp icrâ
İder insâfı rûh-i pâkini peygam-berün dil-şâd
Makâmı pest olur elbet hazîz-i âstânında
Ne denlü itse mîr-i zümre-i Efgâniyân feryâd
Menâbir hutbe-i ezkâr-i nâmıyla felek-pâye
Derâhim buldı nakş-i sikkesinden ‘izzet-i müzdâd
Urıldı sikkesi kişver-be-kişver rûy-i dünyâya
Du’â-yi hutbesin her memleketde itdiler evrâd
Şümâr olmak ne mümkin nakd-i dârü’d-darb-i ihsânı
Şihâb ü necm ile çerh akçe dökse idemez ta’dâd
Netîce sikkeyi mermerde kazdı fart-i himmetle
O hâkân-i hümâyûn-baht o şâhenşâh-i bî-endâd
Zamân-i devlet-i âsâyiş-efzâ-yi sa’îdinde
Yapıldı kalmadı ‘âlemde bir cây-i harâb-âbâd
Kıbâb-i âsmâna eyledi peyveste ez-cümle
Bu dârü’d-darb-i vâlâ-tâk-i ra’nâyı idüp bünyâd
Vekîl-i mutlak ü dâmâdı İbrâhîm paşa kim
Esâsından o dem fermân idince itmege inşâd
O da fikr-i metîn ü dikkat-i re’y-i rezîniyle
İdüp bu kârun itmâmında bezl-i vus’ ü isti’dâd
Bu resm-i dil-nişîn ü tarh-i ‘âlî üzre yapdurdı
O düstûr-i mühendis-tab’ o dânâ-yi kerem-mu’tâd
Te’âla’llâh ‘aceb bünyâd-i mersûs oldı şâhâne
Ki mislin yapmaga kâdir degüldür sad hezâr üstâd
Müferrih tarz-i matbû’ ü safâ-bahş-i dil-ârâsı
Kim eylerse nezâre hâtırı gamdan olur âzâd
Şafak târ ü nukûd-i sîm ü zer necm-i dırahşândur
O tâk ü kubbeler gûyâ burûc-i âsmân-bünyâd
Olur hurşîd ü mâhun ictimâ’ı burc-i vâhidde
Derûnında zer-i berrâk ü sîm oldukça pertev-dâd
İrişdi tâ cidârı kubbesinün tâcdâr itdi
Ser-efrâz eyledi çerhi o bünyâd-i bihîn-îcâd
Mu’ammer eyleyüp sultân-i dehri tûl-i ‘ömr ile
Cenâb-i hazret-i hallâk-i bî-hemtây-i bî-ezdâd
Müşeyyed eyleye tâk-i bülend-eyvân-i ikbâlin
Ola vîrâne-i hızlân kulûb-i düşmen-i hussâd
Dem-i tekmîl ü itmâmında ol bünyân-i ‘âlînün
İderken hâme ilhâm-i cenâb-i Hakdan istimdâd
O dem târîhe Sâmî böyle düşdi mısra’-i yektâ
Yapıldı sikkegâh-i âl-i ‘Osmânî mübârek-bâd
Sene 1138
