Sirişk olmazsa levh-i dilde dâg-i âteşîn olmaz
Mukaddem safha nemnâk olmasa nakş-i nigîn olmaz
Zahım-nâ-horde-dil la’l-i lebünden bûse-çîn olmaz
Ten-i mûm olmadın sûrâh sûrâh engübîn olmaz
Halâvet der-’akabdur telhî-i düşnâm-i la’lünde
Merâret mâni’-i ta’m-i lezîz-i dâr-i çîn olmaz
Tevâzu’ itse de sûret-perestân olma dil-beste
Binâ ser-der-zemîn-i inhirâf olsa metîn olmaz
Olur sûdâgerân-i nazma nâ-şâyeste-i ragbet
Metâ’-i ma’rifet kim zîb-i dûş-i âferîn olmaz
Olan âyîneveş vâ-reste gerd-i hod-perestîden
Dilinde ‘aks-i zişt-i kîneden çîn-i cebîn olmaz
Hayâl-i çîn-i zülfi mâye-i hâmûşî-i dildür
Sevâd-i mûy-i çînî olsa çînîde enîn olmaz
Per-i pervâne-i tedbîr tahrîkinden ey Sâmî
Hudânun şem’-i takdîrine bâd-i âstîn olmaz
