Zihî mahbûb u hûb u nâzük ü hem çâbük ü dil-ber
Gözi nergis yüzi lâle dişi lü’lü lebi şekker
Bu ne tendür bu ne yañah bu ne hâl ü bu ne gîsû
Biri nesrîn biri ter-gül biri müşg ü biri anber
Gözüñ alı-y-ıla gamzeñde saçuñ dâmı-y-ıla zülfüñde
Belâ mazmûn kazâ makrûn cefâ müdgam anâ muzmer
¥iyâ vü zulmeti-y-le hem safâ vü rahmete olmış
Yüzüñ matla saçuñ menzil dişüñ menba lebüñ mazhar
Anâ aynindedür akl u dil ü cân u ten olalı
Gözüñ sad u kaşuñ nûn u yüzüñ tâ hâ lebüñ kevser
Senüñ ışkuñ u şavkuñ u firâk u derdüñ-ile oldı
Göñül mahzûn u göz pür-hûn ciger kânûn yüzüm micmer
Nite kim şem sûz u tâb u mihr ü kahruñ odında
Yanar cânum erir cismüm dudagum huşk u gözüm ter
Gözüñüñ sihri âlından saçuñuñ cevri zulmından
Alam hame yazam nâme düzem kıssa idem mahzar
Bes iltem hüsrev ü mîr ü şeh ü sultâna kim oldur
Cihân-gîr ü cihân-bahş ü cihân-dar ü cihân-dâver
Penâh-ı millet ü devlet melâz-ı milk ü dîn ki oldur
Kamer-serv ü kader-hükm ü kazâ-azm ü melek-mahber
Anuñ izz ü celâl ü kadr ü bahtıçun-durur kâyim
Tokuz âbâ vü dörd ana üç oglı-la yidi ahter
Enâsın u duâsın u müdâm şükrin ü zikrin dir
Yidi heykel yidi uzv u yidi âyet yidi kişver
Ber-â-berdür sehâ vü lutf u cûd u himmetinde anuñ
Eger hâk ola vü yâ zer veger seng ola yâ gûher
Süñüsi-y-ile ohına kılıc u gürzine döymez
Eger cevşen eger begter veger dır u eger migfer
N’irede kopsa cûş-ı ceyş ü katl ü harb ü darb olur
Kılıcı berk ohı bârân ânı rad u atı sarsar
Saña hâzıdur u tâyı saña hâşidür ü tâbic
Eger Kisrî eger Hâkân eger Fagfûr eger Kayser
Degül ihsân u lutf u cûd u bahşişde saña hem-tâ
Eger Hâtim eger Cevne veger Yahyâ veger Cafer
Degüldür tâc u taht u devletde saña begdeş
Eger ›ahhâk eger Çimşîd eger Dârâ vü İskender
Saña irmez kimesne hazm ü azm ü rezm vaktinde
Eger Şâbûr eger Behmen eger Hürmüz eger Nûzer
Olamaz Kahr u mihr ü himmet ü heybetde mânendüñ
Eger Kâvus eger Pervîz eger Bîjen veger Cevzer
Saña hem-tâ olamaz hall ü akd ü hükm ü şevketde
Eger Mansûr eger Nâsır veger Mahmûd eger Sencer
Kapuñda Çingiz ü Tugrıl öñüñde Selçûk u Gâzân
Biri bende biri kih-ter biri hâdim biri çâker
Senünle kâyim ü dâyim senüñle muhkem ü âlî
Eger milk ü eger devlet eger taht u eger efser
Nedür Mısr u Irâk u Rûm u Şâm uş saña erzânî
Semerkand-ıla Hindüstân Hıtâ vü kişver-i Hâver
«enâñ-ıla ter ü tâzedür ü handân u hem hurrem
Ser-i hâme ruh-ı nâme leb-i dîvân dil-i defter
Firâkuñda Ahmedî itmiş fen ü cân-ıla cism ü dil
Birin hâk ü birin bâd u birin âb u birin âzer
Bu gün medh ü duâ vü zikr ü hamdüñ şükri kim itdi
Anuñ sözlerini pâk ü latîf ü azb ü cân-perver
Niçe kim gündüz ü gice geliben sâl ü meh gidüp
Çıha şems ü toga necm ü dura kutb u döne mihver
Saña Allah lutfı vü meh ü mihr ü melek olsun
Biri nâsır biri hâfız biri yâr u biri reh-ber
Saña zıdd u hasûd u hasm u ser-keş olanuñ olsun
Yigi medyûn yigi mahzûn yigi magbûn yigi eb-ter
Saña yâr u sadîk u bende vü çâker olan olsun
Kimi şâh u kimi sultân kimi hân u kimi server
Hümâyûn u mübârek kılsun u ferhunde vü meymûn
Berat u Kadr ü îd ü rûz-ı Nev-rûzuñı Hak yik-ser
